HAKKARİ – Türkiyәnin Şәrqi Anadolu bölgәsindә il. Sah. 9,5 min km2. Əh. 276,3 min (2014). İnz. m. Hakkari ş.-dir. Ş.-dә İranın Qәrbi Azәrbaycan ostanı, c.-da İraqla hәmsәrhәddir; şm.-ında Van, q.-indә Şirnak illәridir. Ərazisi dağlıqdır. Ən yüksәk nöqtәsi Buzul (Cilo) d.-dır (4135 m). Kontinental iqlimi var; qışı uzun vә soyuq, yazı qısa vә istidir. İllik yağıntı dağlarda 1000 mm-dәn çox, aşağılarda 600–800 mm-dir. İqtisadiyyatında heyvandarlıq (qoyun, keçi vә sığır yetişdirilir; arıçılıq inkişaf etmәkdәdir) vә meşәçilik (oduncaq tәdarükü) mühüm yer tutur (әhalinin 90%-i burada çalışır). Əkinçilik, әsasәn, dağәtәyi әrazilәr dә yayılmışdır. Buğda, arpa, çovdar, qarğıdalı, çәltik, noxud vә s., hәmçinin kartof, soğan, tütün, az miqdarda pomidor, bibәr, badımcan, xiyar, kәlәm, sarımsaq vә s. becәrilir. Ənәnәvi üzümçülük hazırda azalmaqdadır. Süd f-ki, әt kombinatı, un dәyirmanları, xalça vә kilim emalatxanaları fәaliyyәt göstәrir. Dәmiryolu vә hava yolu әlaqәsi, yol infrastrukturu yoxdur; bir çox yerdә n.ql. vasitәsi qatırdır. Qışda yollar uzun müddәt bağlı olur.
Hakkari ili. Buzul (Cilo) dagı.
