HALİKARNAS BALIQÇISI (әsl adı Cavad Şakir Qabaağaclı) (17.4.1886, İstanbul – 13.10.1973, İzmir; Bodrumda dәfn edilmişdir) – türk yazıçısı. Atası Mehmed Şakir paşa Krit vә Afinada sәfir vә vali olmuşdur. Oksford Un-tindә tәhsil almışdır (1904– 08). İstanbula qayıtdıqdan sonra “Tikan”, “İnci” vә s. jurnallar üçün karikaturalar çәkmiş, yazılar çap etdirmişdir. Birinci dünya müharibәsi dövründә Bodruma (qәdim Halikarnas) sürgün edilmiş (1924–26), әfv olunduqdan sonra da Bodrumdan ayrılmamış, 1947 ilәdәk orada yaşamış (tәxәllüsü dә buradandır), 1926 ildәn sonra yazdığı әsәrlәrindә H.B. adından istifadә etmişdir. Daha sonra İzmirә köçmüşdür. Hekayә, roman, xatirә janrlarında әsәrlәr yazmış, tәrcümәlәr etmişdir. “Egey sahillәrindәn” (1939), “Salam, Aralıq dәnizi” (1947), “Egeyin dibi” (1952), “Yaşasın dәniz” (1954), “Gülәn ada” (1957), “Egeydәn” (1972), “Gәnclik dәnizlәrindә” (1973) hekayә toplularının, “Aqanta burina burinata” (1946), “Keçmiş günlәrin uşağı” (1956), “Uluç rәis” (1962), “Turqut rәis” (1966), “Dәniz qürbәtçilәri” (1969) romanlarının, “Mavi sürgün” adlı avto bioqrafik әsәrin (1961) müәllifidir. Yunan sivilizasiyasının Anadolu mәnşәli olduğu fikrini irәli sürәrәk onu isbat etmәk üçün “Anadolu әfsanәlәri” (1954), “Anadolu tanrıları” (1955), “Anadolunun sәsi” (1971), “Hey, qoca yurd” (1972) әsәrlәrini yazmışdır. Folklorşünaslığa dair tәdqiqatları, yüzә yaxın tәrcümә kitabı var. Bәzi hekayәlәri Azәrb. dilinә tәrcümә olunmuşdur.
