HALLANMA – 1) sözlәrin bir-biri ilә sintaktik әlaqәyә girmәk üçün hal vә kәmiyyәtә (tәk, cәm) görә dәyişmәsi. Bәzi dillәrdә (mәs., fransız dilindә) H. yoxdur. Bir sıra dillәrdә bir neçә nitq hissәsi hallanır (mәs., rus dilindә isimlәr, habelә onlarla uzlaşan sifәt, say vә әvәzliklәr hallanır). Türk dillәrindә, o cümlәdәn Azәrb. dilindә yalnız isimlәr hallanır; digәr nitq hissәlәri isә ancaq substantivlәşdikdә hallana bilәr. 2) Sözlәrin hal vә kәmiyyәtә görә dәyişmә tipi (paradiqma). Ayrı-ayrı dillәrdә H.-nın tiplәri sayca müxtәlifdir; mәs., Azәrb. dilindә bir, rus dilindә üç H. tipi var.
Əd.: Müasir Azәrbaycan dili. 3 cilddә. C.3. B., 2007.
