HAMÁDA KÓSÁKU (tәxәllüsü H a m a d a S e y r ö ) (22.2.1881, Osaka prefekturası, Kisivada – 25.7.1938, Kioto) – yapon arxeoloqu, Yaponiya EA-nın üzvü (1931). “Müasir yapon arxeologiyasının atası” hesab olunur. Yüksәk rütbәli samuray ailәsindәndir. Osaka vә Tokionun elit mәktәblәrindә, Tokio Un-tindә (incәsәnәt tarixi vә s.) tәhsil almışdır. 1909 ildәn Kioto Un-tindә (1917 ildәn prof., 1930–32 illәrdә әdәbiyyat fakültәsinin dekanı, 1937 ildәn untin prezidenti), o cümlәdәn Yaponiyanın ilk arxeologiya şöbәsindә dәrs demişdir. Avropada ixtisasartırmadan (1913–16) sonra Yaponiyanın ilk arxeologiya dәrsliyini yazmışdır. Umexara Suedzi vә “Kioto arxeologiya mәktәbi”nin digәr üzvlәri ilә birlikdә arxeoloji tәdqiqatlarda müasir metodlardan istifadә edilmәsinә, hesabatların unifikasiyasına vә onların tez bir zamanda nәşr olunmasına çalışmışdır. 1911 ildә Çindә Dunxuan manuskriptlәrini tәdqiq etmişdir. Yaponiyada, Çindә (xüsusilә Cәnubi Mancuriyada), Koreyada aparılan qazıntıların iştirakçısı vә rәhbәri olmuş, Xunşan vә digәr mәdәniyyәtlәrin öyrәnilmәsinin әsasını qoymuşdur. Şәrqi Asiya arxeologiyasına dair ömumilәşdirici әsәrlәrin müәllifidir. Şәrqi Asiya arxeologiyasının tәdqiqi üzrә cәmiyyәtin (1925) tәsisçilәrindәn biri olmuşdur.
