HÁMMARŞELD (Hammarskjöld) Daq Yalmar Aqne Karl (29.7.1905, Yönköpinq – 18.9.1961, Şimali Rodeziya, indiki Zambiya, Ndola,) – İsveç iqtisadçısı, dövlәt xadimi, diplomat, jurnalist, İsveç Akademiyasının fәxri üzvü (1954 ildәn). Nobel sülh mükafatı laureatı (1961, ölümündәn sonra). İsveç Dövlәt xadimi, diplomat, İsveçin baş naziri (1914–17) Y.Hammar şeldin (1862–1953) oğludur. Uppsala Un-tini bitirmişdir. İsveç Mәrkәzi bankının katibi (1935–41), Maliyyә Nazirliyinin stats-katibi (1936 – 41), İsveç Bankının idarә heyәtinin sәdri (1941–48) olmuşdur. Marşall planının hәyata keçirilmәsi çәrçivәsindә Avropa iqtisadi әmәkdaşlığı vә inkişafının tәşkili üzrә konfransda (Paris, 1947) İsveç nümayәndә heyәtinә rәhbәrlik etmişdir. BMT-nin Baş katibi (1953–61) olmuşdur. ÇXR-dә Amerika hәrbi tәyyarәçilәrinin azad edilmәsinә yardım göstәrmişdir (1955). Misirdә (1956) BMT-nin ilk sülhmәramlı missiyasını tәşkil etmişdir. Rodeziya vә Nyasalend Federasiyası әrazisi üzәrindә indiyәdәk müәyyәn edilmәyәn sәbәbdәn baş vermiş tәyyarә qәzasında hәlak olmuşdur.
