HAN (Hahn) Otto (8.3.1879, Frankfurt-Mayn – 28.7.1968, Höttingen) – alman fiziki vә radiokimyaçısı, Berlin EA üzvü (1924). Nobel mükafatı laureatı (1944, tәqdim edilib 1946). Marburq vә Münxen un-tlәrindә tәhsil almışdır. U.Ramzayın (Londonda) vә E.Rezerfordun (Monrealda) rәhbәrliyi altında radioaktivliyә aid tәdqiqatlara başlamış, Berlindә Kimya İn-tunda davam etdirmişdir. 1912 ildәn kayzer Vilhelm ad. Kimya İntunda radiokimya qrupunun direktoru, 1928 ildәn in-tun direktoru olmuşdur. Torium vә b. radioaktiv elementlәrin radioaktivlik xüsusiyyәtlәrini öyrәnirdi. 1907 ildәn L.Maytnerlә әmәkdaşlıq etmişdir; bir sıra radioaktiv izotop vә protaktinium onlar tәrәfindәn kәşf olunmuş, nüvәlәrin betaparçalanması tәdqiq edilmişdir. Tәbii radioaktivliyә malik elementlәrdә nüvә izomerliyini müәyyәn etmiş (1921), geoloji süxurların radioaktivliyinә әsasәn, onların yaşının tәyini üçün üsullar vermişdir. 1934 ildәn Maytner vә F. Ştrassman ilә birlikdә torium vә uranınn neytronlarla şüalandırılması zamanı baş verәn proseslәri tәdqiq etmişdir. 1939 ildә neytronların tәsiri altında uran nüvәlәrinin bölünmәsini kәşf etdi (Ştrassman ilә birlikdә). Alman nüvә proyektindә iştirak edәrәk, atom nüvәlәrinin parçalanması nәticәsindә alınan mәhsulların tәdqiqi üzrә fundamental problemlәrlә mәşğul olmuşdur. 1946–60 illәrdә Maks Plank Cәmiyyәtinin prezidenti, 1960 ildәn fәxri prezidenti olmuşdur.
