HARNA, b u r u q b u y n u z a n t i l o p (Antilope cervicapra) – boşbuynuzlular fәsilәsindәn mәmәli. Eyniadlı cinsin yeganә növüdür. Bәdәninin uz. 100–150 sm, cidov hünd. 60–85 sm, kütlәsi 45 kq-a qәdәrdir. Erkәklәri dişilәrdәn böyükdür. Zәrif bәdәn quruluşu var. Başı balaca, gözlәri iri, qulaqları ensiz vә uzundur. Yalnız erkәklәrdә uz. 73 sm-әdәk olan daraqlı vint şәklindә burulmuş buynuzları var (ikinci adı da buradandır). Tük örtüyü sıx, hamardır. Dişilәrdә vә cavan heyvanlarda bәdәnin üst tәrәfi sarımtıl-qonurdur; yaşlı erkәklәrdә rәngi qonurdan göyümtül çalarlı qarayadәk dәyişir. Bütün fәrdlәrinin qarın, üz, göz әtrafı halqalar vә quyruq “güzgüsü” ağ rәngdәdir. H. Qәrbi Hindistandan Himalay d.-rının c.-una doğru yayılmışdır; ABŞda (Texas) iqlimlәşdirilmişdir. Alçaq otlu bitki örtüyü olan açıq düzәnlik vә tәpәlәrdә yaşayır, k.t. bitkilәri becәrilәn sahәlәrә girir. Sәhәr vә axşam fәaldır. Müxtәlif otlarla, daha az kolların yarpaq vә zoğları ilә qidalanır; çox vaxt sahәlәrdә otlayır. Uzun müddәt susuz qala bilir. H. 10–50 baş olmaqla, adәtәn cavan dişilәr vә yaşlı erkәk fәrdlәrdәn ibarәt qruplarla yaşayır; bәzәn birlәşәrәk böyük sürülәr әmәlә gәtirirlәr. 1–2 bala doğur. H. TTEBMİ-nin “Qırmızı kitab”ına daxil edilmişdir.
Harna (Antilope cervicapra).
