HAŞIMOV Mәhәrrәm Kazım oğlu (2.2. 1912, Bakı – 2.5.1969, Bakı) – Azәrb. rejissoru. Azәrb. SSR xalq artisti (1954). Azәrb. SSR әmәkdar incәsәnәt xadimi (1969). SSRİ Dövlәt mükafatı laureatı (1951). M.F.Axundov ad. Respublika mükafatı laureatı (1968). Dövlәt Teatr Sәnәti İntunu (Moskva) bitirmişdir (1936). 1928 ildәn Bakı fәhlә-gәnclәr teatrı sәhnәsindә aktyorluğa başlamışdır. Sonralar Azәrb. Gәnc Tamaşaçılar Teatrında çıxış etmiş, 1936–44 illәrdә teatrın baş rej. vә direktoru olmuşdur. “Eloğlu”, “Vәtәn” (1937, 1948, A.Şaiq), “Qaçaqlar” (1940, F.Şiller) vә s. tamaşaların quruluşunu vermişdir. H.-un yaradıcılığı, әsasәn, Azәrb. Rus Dram Teatrı ilә bağlı olmuşdur (1948–51 illәrdә direktor vә rej., 1956 ildәn baş rej.). 1951–56 illәrdә Azәrb. Opera vә Balet Teatrının, 1960–65 illәrdә “Azәrbaycanfilm” kinostudiyasının direktoru vәzifәsindә işlәmişdir. H.-un tamaşaları әsәrin ideyasının qabarıq verilmәsi, tәsirliliyi vә emosionallığı ilә seçilmişdir. Ən yaxşı tamaşaları: “Xәzәr üzәrindә şәfәq” (1950, İ.Qasımov), “Balıqçı oğlu” (1953, V.Latsis), “Aydın” (1957, C.Cabbarlı), “Kreml saatı” (1957, N.Poqodin), “Hamam” (1958, V.Mayakovski), “Damokl qılıncı” (1959, N.Hikmәt), “Maskarad” (1959, M.Lermontov), “İrkutsk әhvalatı” (1960, A.Arbuzov), “Milyonçu qadın” (1966, B.Şou), “Kino çәkilir….” (1966, E.Radzinski) vә s. 1938 ildәn pedaqoji fәaliyyәt göstәrmişdir. Qırmızı Əmәk Bayrağı ordeni ilә tәltif edilmişdir.
