HAŞIMOVA Şahnaz Hәsәn qızı (d.2.6.1957, Gәncә) – Azәrb. müğәnnisi. Azәrb. Resp. xalq artisti (2000). Gәncә Musiqi Mәktәbini (muğam şöbәsini) bitirmişdir (1979). İfaçılıq fәaliyyәtinә Gәncәdә toxucuların mәdәniyyәt sarayının “Yasәmәn” ansamblında başlamışdır (1971). 1975 ildәn “Göygöl” xalq çalğı alәtlәri ansamblının solistidir. 1997– 2017 illәrdә Gәncә Dövlәt Filarmoniyasının direktoru olmuşdur. Repertuarına xalq mahnıları (“Uca dağlar”, “Qaragilә”, “Şuşanın dağları” vә s.), muğamlar (Kәsmә şikәstә, Bayatı-kürd, Mirzә Hüseyn segahı, Şahnaz vә s.), Ü.Hacıbәyli, F.Əmirov, C.Cahangirov, T.Quliyev, Ə.Tağıyev, E.Sabitoğlu vә digәr bәstәkarların әsәrlәri, hәmçinin başqa xalqların mahnıları daxildir.
