HAVAY NEKTAR QUŞLARI (Drepanididae) – sәrçәkimilәr dәstәsindәn quşlar fәsilәsi. Uz. 10–20 sm-dir. H.n.q. üçün xarici görünüşün çox müxtәlifliyi sәciyyәvidir. Xüsusilә dimdiyinin forması dәyişkәndir. Nektarla, yaxud meyvә şirәsi ilә qidalanan quşların dimdiyi uzun (bәdәn uz.-nun 1/3-nәdәk), nazik, çox vaxt aşağıya doğru әyilmiş, cücüyeyәn növlәrindә isә düz vә iti, dәn yeyәnlәrdә konusşәkilli vә yoğunlaşmışdır. Lәlәk örtüyü birrәngli vә ya qara, qonur, ağ, sarı, yaşıl, qırmızı vә narıncı rәnglәrdә daxil olmaqla parlaqdır. Bәzi növlәrindә cinsi dimorfizm nәzәrә çarpmır. 12 cinsi, 21 növü var. Havay a-rının endemikidir. Güman edilir ki, H.n.q. ada tәcridi şәraitindә intensiv növәmәlәgәlmә nәticәsindә bir әcdad növdәn yaranmışlar. Meşәlәrdә vә kolluqlar arasında, dağlarda 3000 m-әdәk yüksәkliklәrdә yaşayırlar. Monoqamdırlar. Kasaşәkilli yuvalarını ağacların üzәrindә vә kollarda, bәzәn ağac koğuşlarında, qaya boşluqlarında, yaxud sıx otluqda qururlar. 1–4 (adәtәn 2–3) yumurta qoyurlar, dişi kürt yatır (13–14 sutka); balaları hәr iki valideyn bәslәyir. H.n.q.-nın 19 növ vә yarımnövü TTEBMİ-nin “Qırmızı kitab”ına daxil edilmişdir.
Qara-qırmızı havay nektar quşu
(Vestiaria coccinea).
(Vestiaria coccinea).
