HAYNÁN – Çindә әyalәt. Cәnubi Çin dәnizinin eyniadlı adasında yerlәşir. Sah. 34 min km2. Əh. 10 mln. (2020). İnz. m. Haykou ş.-dir.
Tәsәrrüfat. Əyalәtin әrazisi faydalı qazıntılarla (әsasәn, dәmir, titan, marqan, volfram, boksit, molibden, kobalt, mis, qızıl, gümüş vә s.) zәngindir. Sәnayenin zәif inkişaf etmәsinin başlıca sәbәbi elektrik enerjisi ehtiyatlarının az olmasıdır. Əsas enerji mәnbәyi SES-dir. Daxili bazar üçün k.t. maşınları vә tekstil mәhsulları istehsal edilir. H.-ın iqtisadiyyatı k.t.-na әsaslanır vә ixracatın tәqr. yarısını k.t. mәhsulları tәşkil edir. Tropik iqlim ilboyu k.t. ilә mәşğul olmağa vә ildә 2–3 dәfә mәhsul yığmağa imkan verir. Çәltik, hindqozu, sizal, batat, qarğıdalı, maniok, sarqo, paxlalı bitkilәr, tropik meyvәlәr (Çinin aparıcı ananas istehsalçısıdır); qarpız, manqo, mandarin, banan, hәmçinin tәrәvәz, qara istiot, qәhvә, çay, keşyu fındığı, kakao vә şәkәr qamışı becәrilir. Qaramal, әsasәn, keçi, inәk, kәl, hәmçinin toyuq, qaz vә ördәk yetişdirilir. Xanı balığı, ispan skumbriyası vә tuna balığı (tunes) offşor balıqovlamanın böyük hissәsini tәşkil edir. Molyusk vә mirvari dayaz buxtalarda, yaxud hovuzlarda daxili bazar vә ixrac üçün yetişdirilir; krevet vә tilapiya istehsalının tәqr. yarısı ixrac olunur. Burada tәqr. 100 min yerli vә kommersiya balıqyetişdirmә tәsәrrüfatı var. Tropik çimәrliklәr vә sıx meşәlәr turizmin inkişafında mühüm rol oynayır.
