HAYNKES (Heynckes) Yozef (Yupp) (d.9.5.1945, Mönxenqladbax) – Almaniya idmançısı vә mәşqçisi. Dünya futbolu tarixindә әn yaxşı mәşqçilәrdәn biridir. “Borussiya” (Mönxenqladbax; 1964–67, 1970–78) vә “Hannover 96” klublarının heyәtindә hücumçu kimi çıxış etmişdir; 433 oyunda 271 qol vurmuşdur. 4 dәfә AFR çempionu (1971–77), AFR kuboku (1973) vә UEFA kubokunun (1975) sahibidir. İki dәfә ölkә çempionatının (1974 – G.Müllerlә birlikdә hәr biri 30 qol; 1975 – 27 qol) vә UEFA kubokunun (1973 – 12 qol; 1975 – 10 qol), bir dәfә Avropa çempionlar kuboku (1976 – 6 qol) vә Kuboklar kubokunun (1974 – 8 qol) әn yaxşı bombardiri olmuşdur. AFR yığma komandasının heyәtindә (1967–1976) 39 oyun keçirmiş, 14 qol vurmuşdur; dünya (1974) vә Avropa (1972) çempionudur. 1979–2013 illәrdә mәşqçi işlәmişdir. Ən böyük uğurunu “Bavariya” (Münxen; 1987–91, 2009, 2011–13) vә “Real” (Madrid, 1997–98) komandalarına rәhbәrlik etdiyi vaxt әldә etmiş, 3 dәfә Almaniya çempionu titulunu (1989, 1990, 2013) qazanmış, Almaniya kubokunun (2013) vә 3 dәfә Almaniya Superkubokunun (1987, 1990, 2012), iki dәfә UEFA Çempionlar liqasının (1998, 2013) qalibi; Çempionlar liqasının finalçısı (2012) olmuşdur. FİFA versiyası üzrә ilin mәşqçisi seçilmişdir (2013).
