HELENİUM (Helenium) – mürәkkәb çiçәklilәr fәsilәsindәn bitki cinsi. 30-dan çox növü var. Vәtәni Şimali vә Mәrkәzi Amerikadır. Hünd. 160 sm-әdәk olan ot bitkilәridir. Çiçәklәri sәbәt çiçәk qrupunda toplanmışdır. Yan çiçәklәri dilcikvarı, rәngi qızılıdan qәhvәyi tonlaradәkdir; orta çiçәklәri boruvarı, adәtәn daha tünd rәngli olur. İki rәngli vә zolaqlı dilcikvarı çiçәklәri olan formaları var. Gülçülükdә H.-un 6 növü vә kolunun hündürlüyü, çiçәklәrinin rәngi, çiçәk qrupunun ölçülәri, çiçәklәmә müddәtinә (iyun-sentyabr) görә fәrqlәnәn çoxlu sayda bağ formalarından istifadә edilir; digәrlәrindәn daha çox payız H.-u (H. autumnale) becәrilir. Onun müxtәlif bağ formaları vә hibridlәri, hibrid H.-u (H. hybridum) adı altında birlәşdirilir. H.-u açıq sahәlәrdә, yüngül qranulometrik tәrkibli zәngin üzvi maddәli torpaqlarda әkirlәr. Toxumlarla çoxaldılır.
Payız helenimu (Helenium autumnale).
