HENİ (Henie) Sonya (8.4.1912, Kristianiya, indiki Oslo – 12.10.1969) – Norveç vә ABŞ idmançısı, aktrisa. İdman tarixindә tәk sürüşmәdә yeganә 3 dәfә Olimpiya çempionu (1.1.2017 il mәlumatına görә). 1941 ildә ABŞ vәtәndaşlığını qәbul etmişdir. H. 12 yaşında Şamoni (1924) Qış Olimpiya Oyunlarında iştirak etmiş vә 8-ci yeri tutmuşdur. 2 ildәn sonra dünya çempionatında (1926) debüt etmiş vә gümüş mükafata layiq görülmüşdür. Öz proqramına “Sonalar gölü” baletindәn A.V.Pavlovanın rәqs elementlәrini daxil etmiş vә dünya çempionatında (1927) ilk qızıl medalını qazanmışdır. Sonralar heç bir startda mәğlub olmamış (1928–36), üç Ağ Olimpiadanın (1928, Sankt-Morits; 1932, Leyk-Plesid; 1936, Qarmiş-Partenkirxen), 9 dәfә dünya (1928–36, fiqurlu sürüşmә tarixindә unikal hadisә), 6 dәfә Avropa (1931–36), 7 dәfә Norveç (1923–29) çempionu olmuşdur. Milli çempionatlarda qoşa sürüşmәlәrdә (1926–28; A.Li ilә birlikdә) üç dәfә qәlәbә qazanmışdır. 1937–45 illәrdә Hollivudda 13 filmdә, o cümlәdәn “Nazik buz” (1937), “Günәşli vadinin serenadası” (1941; “Oskar” mükafatının üç nominasiyasına layiq görülmüşdür) filmlәrindә baş rollardan birinә çәkilmişdir. 1968 ildә hәyat yoldaşı norveçli biznesmen vә xeyriyyәçi N.Unstadla birlikdә hәr il 100 minә yaxın ziyarәtçisi olan Heni – Unstad İncәsәnәt Mәrkәzini (Oslo yaxınlığında Akershus qub., Berum kommunası) yaratmışdır. Parisdәn Osloya uçarkәn tәyyarәdә vәfat etmişdir.
