HERTS (Hertz) Qustav Lüdviq (22.7.1887, Hamburq – 30.10.1975, Berlin) – alman fiziki. Almaniya EA (Berlin) üzvü, SSRİ EA әcnәbi üzvü (1958). Nobel mükafatı laureatı (1925, C.Frankla birlikdә). SSRİ Dövlәt mükafatı laureatı (1951). H.R.Hertsin qardaşı oğlu. Höttingen, Münxen vә Berlin un-tlәrindә oxumuşdur; e.d. (1911). 1913 ildәn Berlin Un-tinin Fizika İn-tunda, 1920–25 illәrdә Niderlandda “Philips“ firmasının fizika laboratoriyasında işlәmişdir. 1925 ildәn Halledә un-tin prof.-u vә onun nәzdindә Fizika İn-tunun direktoru, 1928 ildәn Şarlottenburq Texniki Un-tinin nәzdindә Fizika İn-tunun direktoru, 1935 ildәn “Siemens und Halske” firmasının elmi tәdqiqat laboratoriyasının direktoru olmuşdur. 1945 ildә SSRİ-yә göndәrilmiş vә 10 ilә yaxın Suxumi ş. atom enerjisinә vә radar qurğularına aid tәdqiqatlara rәhbәrlik etmişdir. 1954–61 illәrdә Leyptsiqdә un-tin prof.-u olmuş, Fizika İn-tunun bәrpasına rәhbәrlik etmişdir. 1913 ildә Frankla birlikdә Bor nәzәriyyәsinin әsasını tәşkil edәn atomun daxili enerji sәviyyәlәrinin diskretliyini eksperimental isbat etmiş vә civә atomunun hәyacanlanma enerjisini ölçmüşdür (Frank–Herts tәcrübәsi). İzotopların bölünmәsi üçün qaz-diffuziya üsulunu tәklif etmişdir.
