HÉRTSŞPRUNQ (Hertzsprung) Eynar (8.10.1873, Danimarka, Frederiksborq – 21.10.1967, Danimarka, Töllöse) – Danimarka astronomu, Danimarka EA vә bir çox әcnәbi akademiyaların üzvü. Kopenhagen Politexnik İn-tunun mühәndis-kimyaçı ixtisasını bitirmişdir (1898). Kopenhagen Un-tinin (1902–09), Potsdam (1909–19), Leyden Un-tinin (1919–45, 1935 ildәn direktor) rәsәdxanalarında işlәmişdir. Əsas elmi tәdqiqatları astrofizikaya vә ulduz astronomiyasına aiddir. H. eyni spektral sinfә aid ulduzların nәhәnglәrә vә cırtdanlara ayrılmasını kәşf etmişdir (1905); ilk dәfә Ülkәr vә Hiadalar topalarında ulduzların görünәn ulduz ölçüsü vә rәng göstәricisi arasındakı asılılığın diaqramını qurmuşdur (1911, sonralar o zaman mәsafәsi mәlum olan bütün ulduzlar üçün analoji diaqramı Amerika astronomu H.Rassel qurmuş vә Hertsşprunq–Rassel diaqramı adlandırılmışdır). H. sefeidlәrә әsasәn ulduz mәsafәlәrinin tәyin olunması üsulunun әsasını qoymuş vә Kiçik Magellan Buluduna qәdәr mәsafәni tәyin etmişdir. Qoşa vә dәyişәn ulduzların öyrәnilmәsi üçün ilk dәfә fotoqrafiyanı tәtbiq etmişdir (1914–19). London Kral Astronomiya Cәmiyyәtinin Qızıl medalı ilә tәltif olunmuşdur (1929).
