HESS Mayra (25.2.1890, London – 25.11.1965, London) – ingilis pianoçusu. 1902 ildә Gildholl musiqi vә teatr mәktәbini (C.Paskal vә O.Morqanın sinfini), 1907 ildә Londondakı Kral musiqi akademiyasını (T.Matteyin sinfini) bitirmişdir. Debütü 1907 ildә London Kuins-hollunda (T.Biçemin rәhbәrlik etdiyi ork.-lә) olmuşdur. 1922 ildәn başlayaraq, Avropa ölkәlәrinә vә ABŞ-a qastrol sәfәrlәrinә çıxmışdır. 1939–46 illәrdә Milli qalereyada Britaniya tamaşaçıları üçün populyar olan “Nahar konsertlәri” vermişdir (150-si onun solo konsertlәri idi). Karneqi-hollda (1946 ildәn), Albert-hollda dәfәlәrlә çıxışları olmuşdur. Bir sıra beynәlxalq kamera musiqisi festivallarında iştirak etmişdir. Müğәnnilәrdәn N.Melba, Lotte Leman, instrumentalçılardan F.Kreysler, İ.Stern, Y.Sigeti, P.Kasalsla; A.Boult, B.Valter, A.Toskanini vә b.-nın idarәsi ilә ork.-lәrlә çıxış emtişdir. Onun repertuarının әsasında Vyana klassiklәrinin әsәrlәri (H.-in inter pretasiyasında L. van Bethovenin 4-cü konserti vә son üç sonatası, V.A.Motsartın konsertlәri), romantik bәstәkarlardan daha çox R.Şumanın musiqisi dayanırdı. Kütlәvi çıxışlarına 1961 ildә son qoymuşdur. 1941 ildә Britaniya İmperiyasının Xanımi tituluna layiq görülmüşdür.
