HESS Viktor Frans (24.6.1883, Ştiriya, Valdştayn – 17.12.1964, Nyu-York ştatı, Maunt-Vernon) – Avstriya vә Amerika fiziki vә radiobioloqu. Nobel mükafatı laureatı (1936). Qratsda un-ti bitirmişdir (1906). Vyana Untindә vә 1910 ildәn onun nәzdindәki Radium Tәdqiqatları İn-tunda çalışmışdır. 1920 ildәn Qrats Un-tindә (1925 ildәn prof.) vә eyni zamanda 1921 ildәn ABŞ-ın Radium korporasiyasında işlәmişdir. 1931 ildәn İnsbrukda Radiasiya Tәdqiqatları İn-tunun prof.-u vә direktoru, 1938 ildәn ABŞ-da Fordem Untinin prof.-u olmuşdur. Böyük hündürlükdә işlәyә bilәn cihazlar yaratmış vә aerozondların kömәyi ilә onları yuxarı qaldıraraq atm.-dә radiasiyanın sәviyyәsinin hündurlükdәn asılılığını ölçmüşdür. 1912 ildә, sonralar kosmik şüalar adlandırılan şüalanmanın mövcüd olması nәticәsinә gәlmiş, onun intensivliyinin variasiyalarıını öyrәnmiş, “ion külәyini” kәşf etmişdir. 1946 ildә dünyada ilk dәfә atm. yağıntılarının radioaktivlik sәviyyәsinin ölçülmәsinә rәhbәrlik edib. Qamma-şüalanmaya әsasәn insan bәdәnindә az miqdarda radiumun aşkar edilmәsi üsulunu işlәyib hazırlamışdır (başqa alimlәrlә birlikdә).
