HÉYFETS (Heifetz) Yaşa [İosif Robertoviç (Ruvimoviç)] (2.2.1901, Vilno, indiki Vilnüs – 10.12.1987, Los-Anceles) – Amerika violinçalanı. 20 әsrin әn görkәmli violin ifaçılarından biri. Uşaqlıqda atasından, 1905–09 illәrdә Vilnoda E.Y.Malkindәn dәrs almışdır. 1910 ildәn S.-Peterburq konservatoriyasında oxumuş, 1911 ildә bu şәhәrdә ilk çıxışı olmuşdur. 1912 ildә Berlin filarmonik orkestrinin konsertlәrindәki çıxışı ona uğur gәtirmişdir. 1912–13 illәrdә Hamburq, Praqa, Leypsiq, Vyana, S.-Peterburq vә s. şәhәrlәrdә, 1916 ildә Skandinaviya ölkәlәrindә qastrol sәfәrlәrindә olmuşdur. 1917 ildә ABŞ-a köçmüşdür. Karnegi-holldakı (1917) uğurlu çıxışından sonra ABŞ vә digәr ölkәlәrә qastrola çıxmışdır. B.Britaniyada (1920), Avstraliyada (1921), Şәrqi Asiya ölkәlәrindә (1923), Fәlәstindә (1926) çıxış etmişdir. H.-in repertuarına İ.Brams vә Y.Sibeliusun, M.Kastelnuovo-Tedesko vә U.Uoltonun konsertlәri Bize-nin “Karmen” operasının mövzuları üzrә F.Vaksmanın fantaziyası vә s. daxil idi. H. yaradıcılığı üçün müstәsna dәrәcәdә hәr tәrәfli violin texnikası, sürәtli ifa tempi sәciyyәvi idi. Çoxlu sәsyazıları saxlanılmışdır. 1962 ildәn Cәnubi Kaliforniya Un-tindә (Los-Anceles) dәrs demiş, 1975 ildәn musiqi fakültәsinә rәhbәrlik etmişdir. Violin vә fp. üçün bir çox transkripsiyaların, Brams vә V.A.Motsartın (KV218, D-dur) konsertlәrinә kadensiyaların müәllifidir.
