HƏMİD ƏLİMCAN (tәxәllüsü; әsl adı vә soyadı Hәmid Əlimcanoviç Əzimov) (12.12.1909, Cizak – 3.7.1944, Daşkәnd) – özbәk şairi, tәnqidçi, publisist. Özb.SSR EA-nın m. üzvü (1943). Özb. Pedaqoji akademiyasını bitirmişdir (1931). Özbәkistan Yazıçılar İttifaqının sәdri (1939–44) olmuşdur. “Bahar” adlı ilk şeirlәr toplusu 1926 ildә nәşr edilmişdir. “Alov saçlar” (1931), “Düşmәnә ölüm” (1932), “Çayda gecә” (1936), “Ölkә” (1939) topluları müasirliyi әks etdirәn poetik forma axtarışları ilә seçilir. H.Ə.-ın mәhәbbәt lirikası, әsasәn, hәyat yoldaşı şairә Zülfiyyәyә hәsr edilmişdir. “Aygül vә Bәxtiyar”, “Zeynәb vә Aman” (hәr ikisi, 1938), “Bәxt” (1940) poemalarının, folklor motivlәri әsasında yazdığı “Simurq” (1939) mәnzum nağılının; Böyük Vәtәn müharibәsi haqqında әsәrlәrin [“Silaha sarıl” şeir toplusu (1942), “Döyüşçü Tursun” (1942), “Roksananın göz yaşları” (1944) poemaları; “Müqәnna” (1943) tarixi dramı vә s.] müәllifidir. Klassik vә yeni dövr özbәk әdәbiyyatına dair mәqalәlәri var. A.S.Puşkin, M.Y.Lermontov vә M.Qorkinin әsәrlәrini özbәk dilinә çevirmişdir. Azәrb. qadınlarının şәrәfinә şeir hәsr etmişdir.
Ə s ә r l ә r i: Şeirlәr, “Özbәk әdәbiyyatı antologiyası” kitabında. B., 1958; Избр. произв., Ташкент, 1971; Избр., M., 1979.
Əd.: Кё р о г л ы Х. Узбекская литература, 2 изд., M., 1976; X ә l i l o v P. Türk xalqlarının vә şәrqi slavyanların әdәbiyyatı. B., 1994.
