HƏSƏNOV Bәdrәddin İbrahim oğlu (1.11.1929, Masallı r-nunun Ərkivan k. – 28.1.1998, Bakı ş.) – Azәrb. torpaqşünası. Biologiya e.d. (1992). S.M.Kirov ad. ADU-nu bitirmişdir (1952). Azәrb. SSR EA-nın Torpaqşünaslıq vә Aqrokimya İn-tunda kiçik elmi işçi (1952), baş elmi işçi (1960) olmuşdur. 1960–71 illәrdә FAO BMT xәtti ilә torpaqşünas ekspert kimi Birma İttifaqında (Ranqun ş.) uzunmüddәtli ezamiyyәtdә olmuşdur. 1971 ildәn in-da qonur meşә torpaqları kompleksinin genezi vә dinamikası sahәsindә elmi işi davam etdirmiş, 1975 ildәn Kosmik Tәdqiqatlar İn-tunda laboratoriya müdiri vәzifәsindә çalışmışdır. Tәdqiqatları torpağın genezisi vә coğrafiyası, xәritәlәşdirilmәsi, rütubәtli subtropik vә tropik, habelә dağ-meşә torpaqlarının, aerokosmik eksperimentlәrin tәtbiqi ilә bitki-torpaq resurslarının uzaq mәsafә vasitәsilә qabaqcadan öyrәnilmәsinә, uzaq mәsafәdәn zondlaşdırma yolu ilә torpaq-bitki resursları metodikasının işlәnib hazırlanmasına vә s. hәsr edilmişdir. Kadr hazırlığında xidmәti var. H. 88 elmi әsәrin, o cümlәdәn 1 monoqrafiyanın, çoxsaylı torpaq xәritәsinin vә 3 kitabçanın müәllifidir. O, Dokuçayev medalı, SSRİ KTNS-nin bürünc medalı, “Əmәk veteranı” medalı ilә tәltif edilmişdir.
Ə s ә r i: Г а с а н о в Б. И. Буроземообразование в лесных почвах Азербайджана. Б., 1984.
