HƏSƏNOV Əşrәf Hәsәn oğlu (24.1.1909, Nuxa, indiki Şәki – 9.8. 1983, Bakı) – Azәrb. dirijoru, pedaqoq. Azәrb. SSR xalq artisti (1959). Azәrb. SSR әmәkdar incәsәnәt xadimi (1940). Azәrb. Dövlәt Konservatoriyasını (1932) vә Moskva Dövlәt Konservatoriyasını (1938) bitirmişdir. Azәrb. Radio Komitәsi nәzdindәki simfonik ork.-ә rәhbәrlik etmişdir (1938–50). 1932–79 illәrdә Azәrb. Opera vә Balet Teatrının dirijoru olmuşdur. Professional tәhsil almış ilk azәrb. dirijorlardan olan H. opera teatrında “Leyli vә Mәcnun”, “Koroğlu” (Ü.Hacıbәyli), “Şahsәnәm” (R.Qlier), “İvan Susanin” (M.Qlinka), “Traviata”, “Aida” (C.Verdi), “Qaratoxmaq qadın”, “Yevgeni Onegin” (P.Çaykovski), “Qar qız” (N.Rimski-Korsakov),”Karmen” (J. Bize), “Su pәrisi” (A.Darqomıjski) vә s. tamaşalara dirijorluq etmişdir. D.Şostakoviçin 7-ci (“Leninqrad”) simfoniyasının ilk dirijorlarından biri olmuşdur (1942, 2–3 oktyabr, Bakı). Azәrb. Dövlәt Konservatoriyasında opera hazırlığı sinfinә rәhbәrlik etmişdir (1960 ildәn dosent). “Şәrәf nişanı” ordeni ilә tәltif edilmişdir.
