HƏŞTƏRXAN DÖVLƏT TƏBİƏT BİOSFER QORUĞU – RF Hәştәrxan vil.-ndә, Volqa çayı deltasının dәnizsahili hissәsindәdir. Sah. tәqr. 670 km2; üç ayrı-ayrı sahәdәn ibarәtdir. 1919 ildә Volqa çayı deltasının nadir tәbii kompleksini qorumaq mәqsәdilә yaradılmışdır. 1975 ildәn qoruğun әrazisi beynәlxalq әhәmiyyәtli subataqlıq sahәlәrinә daxil edilmişdir. Florasında 280-dәn çox bitki növü (o cümlәdәn relikt vә endemik) var; Xәzәr şanagüllәsi, su fındığı, susünbülü, suqamışı, ağ suzanbağı pöhrәliklәrinә rast gәlinir. Qoruqda tәqr. 230 quş növü mәskunlaşmışdır; әsasәn, su-bataqlıq quşları üstünlük tәşkil edir; qu qaz, boz qaz, qaşqaldaq, qırmızı-burun dalğıc, danquşu, belibağlı, vağ vә s. var. Mәmәlilәrdәn (tәqr. 30 növ) qaban geniş yayılmışdır; canavar, tülkü, susamuru, sincab vә çölsiçanına, nadir hallarda desmana rast gәlinir. Amerika su samuru, ondatra vә yenotabәnzәr it iqlimә uyğunlaşdırılmışdır. Sürünәnlәrdәn bataqlıq tısbağası, adi vә suilanları, bağailanı, kәrtәnkәlә var. Balıqlar 60 növdәn çoxdur; karp fәsilәsi (sazan, çapaq, tinqa, xәşәm, qızılüzgәc vә s.), hәmçinin durnabalığı, naqqa, xanı balığı, sıf geniş yayılmışdır. Qoruq ovluq balıqların kürü tökmә vә qışlama yeridir. Qoruqda Volqa çayı deltasının dәyişmә dinamikası vә hidrologiyası üzrә uzun müddәtli müşahidә aparılır.
Hәştәrxan Dövlәt Tәbiәt Biosfer qoruğu.
