HİBBONLAR (Hylobates) – hibbonkimilәr fәsilәsindәn mәmәlilәr cinsi. 5–7 növü var. Bәdәninin uz. 65 sm-әdәk, kütlәsi 8 kq-a qәdәrdir. Müxtәlif rәnglidir. Ağpәncә H.-ın (H. lar) ağ rәngli pәncә vә әllәri bәdәninin tünd rәngi ilә kontrastdır; qarapәncә H.-ın (H. agilis) әtrafları vә bütün bәdәni qaradır, alnında ağ zolaq var; Klos H.-ının (H. klossi) rәngi әsasәn qara, üzünün әtrafı ağ tüklәrlә haşiyәlәnmişdir, gümüşü H.-ın (H. moloch) rәngi qaradan gümüşü-boza qәdәr dәyişir. Hind-Çin vә Malakka y-alarının c.-unda, Mentavay arxipelaqında, Yava, Sumatra vә Kalimantan a-rında yayılmışlar. Yağıntılı vә tropik dağlıq meşәlәrdә (2000 m hünd.-yәdәk) yaşayırlar. Buğumayaqlılar, quş balaları vә onların yumurtaları da rasiona daxil olmaqla, meyvә, yarpaq vә cavan zoğlarla qidalanırlar. Ağaclarda gәzirlәr; budaqları әllәri ilә tutaraq, budaqdan-budağa “uçurlar”; bu zaman ardıcıl olaraq uz. 10 m-ә qәdәr bir neçә tullanma hәrәkәti (braxiasiya) edә bilirlәr. Yerә nadir hallarda düşürlәr. Ən çox tәdqiq olunmuş ağpәncә H. yaşlı fәrdlәr vә balalardan ibarәt (bәzәn qoca fәrdlәr dә olur) ailәvi qruplar әmәlә gәtirirlәr. Ailәlәrin tutduğu әrazilәrә yad qrupların hücumu zamanı qorxulu bağırtılar vә eybәcәr mimikalarla müşaiyәt olunan münaqişәlәr baş verir; davaları nadir hallarda olur. Ailә qonşu qrupların kömәyi ilә sәhәrlәr oxumaq (trellәrә keçәn tam oktava ölçüsündә melodik sәslәr) üçün yığılırlar. Cütlәrin bir balası doğulur. Cinsi yetişkәnliyә 7–10 yaşlarında çatırlar.
Ağpәncә hibbon (Hylobateslar).
