HİDRODİNAMİK ŞÜALANDIRICI – maye mühitlәrdә sәs vә ultrasәs diapazonlu akustik dalğaların generasiyası üçün qurğu. H.ş.-nın iş prinsipi su altında qalmış turbu-lent şırnağın enerjisini akustik enerjiyә çevirmәyә әsaslanır. Ucluqdan çıxan şırnağın maneә ilә qarşılıqlı tәsirindәn hәyәcanlanma, nәticәdә isә ucluq ilә maneә arasındakı fәzada avtorәqs rejimi yaranır. Sәsin şüalanma mexanizmi H.ş.-nın konstruksiyasından asılıdır. Lövhәşәkilli H.ş.-lar daha çox yayılmışdır. Bu konstruksiyada yarıqlı ucluğun qarşısında yerlәşәn vә şırnaq tәrәfә iti ucu olan lövhәdә maye axını әyilmә rәqslәri yaradır. Sәsin intensiv şüalanması üçün lövhәnin mәxsusi tezliklәri ilә şırnağın avtorәqslәrinin tezliklәri uyğun gәlmәlidir. H.ş.-da akustik rәqslәrin tezliyi 0,3–35 kHs, şüalanma intensivliyi 1–3 Vt/sm2-dir. Mayelәrdә texnoloji proseslәrin (mәs., bәrk hissәciklәrin disperslәşdirilmәsindә, ultrasәs tәmizlәmәdә vә s.) intensivlәşdirilmәsi üçün istifadә olunur.
Lövhәsi rәqs qovşağında (a), konsolla (b) bәrkidilәn lövhәşәkilli hidrodinamik şüalandırıcının konstruksiyası: 1 – ucluq; 2 – lövhәcik; 3 – bәrkitmә nöqtәlәri; 4 – rәqslәrin generasiya sahәsi.
