HİKS (Hicks) Con Riçard (8.4.1904, Uonik – 20.5.1989, Blokli) – ingilis iqtisadçısı, neokeynsçiliyin nümayәndәsi. Nobel laureatı (K.Errou ilә birlikdә, 1972). Oksford Un-tini (1926) bitirmiş, Kembric (1935–38), Mançester (1938–46) vә Oksford (1946–71) un-tlәrindә dәrs demişdir. Britaniya EA-nın üzvü (1942) olmuşdur. H.-in tәlәb nәzәriyyәsi (“Dәyәr vә kapital”, 1939; “Tәlәb nәzәriyyәsinә yenidәn baxış”, 1956) sayәsindә istehlakçının davranışına tәsir göstәrәn obyektiv amillәrin tәhlilinә başlanılmışdır. “Əmәkhaqqı nәzәriyyәsi” (1932) әsәrindә H. kәşflәrin istehsal funksiyasına tәsrini öyrәnmiş, neytral, әmәyә vә kapitala qәnaәt edәn elmi-texniki tәrәqqi anlayışlarını elmә daxil etmişdir. Pula olan tәlәbi kapital aktivi növü kimi nәzәrdәn keçirmişdir. H.-in tsikl nәzәriyyәsi akselerator, multiplikator, avtonom investisiyalar vә lәngiyәn funksiyalar konsepsiyalarını ehtiva edir. Stabil vә optimal inkişaf yollarının öyrәnilmәsindә müqayisәli dinamika anlayışından istifadә olunmuşdur. “İqtisadiyyatda sәbәbiyyәt” (1979) әsәrindә M.Fridmenin empirizminә qarşı abstrakt moddellәşdirmә metodunun qanunauyğunluğunu әsaslandırmışdır.
Ə s ә r l ә r i: The Theory of Wages, 1932; General Theory Employment, Interest and Money, 1936; Capital and Growth, 1965; Capital and Time, 1973.
