HİQQS Piter (ing. Peter Ware Higgs) (d.29.5.1929, İngiltәrә, Nyukasl apon Tayn) – Britaniya nәzәriyyәçi-fiziki. Edinburq Kral Cәmiyyәtinin vә London Kral Cәmiyyәtinin üzvü. Nobel mükafatı laureatı (2013, belçikalı fizik F.Enqlerlә birlikdә; bozonun varlığının nәzәri üsullarla әsaslandırılması sahәsindә gördüyü işlәrә görә). London kral kollecini bitirmişdir (bakalavr, 1950; magistr, 1951). 1954–56 illәrdә vә 1960 ildәn Edinburq Un-tindә işlәmişdir (1980 prof., 1996 ildәn fәxri prof.). Elmi işlәri elementar zәrrәciklәr fizikası sahәsindәdir. Hәlә 1960 ildә H. elektrozәif simmetriyanın spontan pozulması mexanizmini irәli sürmәklә, elementar zәrrәciklәrdә vә xüsusәn dә, W- vә Z- vektor bozonlarında kütlәnin әmәlә gәlmәsini izah edә bilmişdir. Bu mexanizm, indi onun adını daşıyan yeni elementar zәrrәciyin – Hiqqs bozonunun mövcudluğunu tәlәb edirdi. 4 iyul 2012 ildә CERN-dә (fr. Conseil Européenne pour la Recherce Nucéaire – Avropa Nüvә Tәdqiqatları Tәşkilatı) keçirilәn rәsmi mәtbuat konfransında bu zәrrәciyin eksperimental surәtdә kәşf edildiyi elan olundu. Bu kәşfdәn sonra müasir elementar zәrrәciklәr fizikasının әsasında duran Standart Modelin doğruluğuna inam daha da artdı. Nәzәri fizika sahәsindәki nailiyyәtlәrinә görә H. bir çox mükafat vә medallara, o cümlәdәn elementar zәrrәciklәr vә yüksәk enerjilәr fizikası üzrә Avropa Fizika Cәmiyyәtinin mükafatına, Rezerford medalı vә mükafatına vә s. layiq görülmüşdür.
