HİPERTRİXÓZ (hiper... + yun. ϑρίξ, yiyәlik halda τριχός – tük + ... oz), t ü k l ü l ü k – mәxsus olduğu cins vә yaş üçün xarakterik olmayan hәddәn artıq tüklәnmә. Anadangәlmә vә qazanılmış ola bilәr. Ana dangәlmә H. genetik anomaliya kimi qiymәtlәndirilir, bu zaman bütün dәri sәthi ömürlük qalan uzun tüklәrlә örtülü olur vә bәzәn dişin olmaması ilә birlikdә müşahidә edilir. Anadangәlmә yerli H. mәhdud sahәlәrdә uzun tüklәrin çox böyümәsi vә çox vaxt rәngli xalların üzәrindә olması ilә tәzahür edir.
Qazanılmış H. çox hallarda sinir-endokrin pozuntularla [pubertat (qızlarda cinsi yetişkәnlik dövründә yanaqlarda, buxaqda, üst dodaqda zәrif tükün hәddәn artıq uzanması), klimakterik (qadınlarda klimakterik yaşda), virilizm (yetkin qadınlarda saqqal vә bığın meydana çıxması), steroid (qlükokortikoid hormonlarla uzunmüddәtli müalicә zamanı)] әlaqәdar olur.
Qazanılmış H.-da m ü a l i c ә n i n effektivliyi endokrin, mübadilә vә ya sinir pozuntularının korreksiyası mümkünlüyündәn asılıdır. Kosmetik mәqsәdlәr üçün piqment sizlәşdirici (solğunlaşdırıcı) spirtli mәhlullar vә mәlhәmlәr (çox vaxt perhidrol ilә), tüklü sahәlәrin süngәr daşı ilә “cilalanması”, dövri olaraq tükün qırxılması vә ya tüklәrin depilyatorla (tük hәlledicilәri ilә) tәmizlәnmәsi tәtbiq olunur. Mәhdud H. zamanı epilyasiya – tükün pinsetlә kәnar edilmәsi tövsiyә edilir. Sinir-damar tük mәmәciklәrinin mәhv edilmәsi ilә aparılan lazer vә elektroliz epilyasiyası daha effektivdir. Anadangәlmә ümumi H.-un müalicәsi perspektivsizdir; ancaq mәhdud H. zamanı dәrinin zәdәlәnmiş sahәlәrini cәrrahi üsulla aradan qaldırmaq mümkündür.
