HİPPİ (ing. hippy, hippie) – 1960-cı illәrdә ABŞ-da gәnclәr mühitindә meydana gәlmiş ictimai hәrәkat. Daha әvvәlki (1950-ci illәrin sonu – 1960-cı illәrin әvvәli) nәslin formalaşdırdığı әks-mәdәniyyәt әnәnәsini davam etdirmişdir. ABŞ әhalisinin 0,2%-ni tәşkil etmәklә әn geniş yayılma dövrü 1967 il olmuşdur. İlk dәfә jurnalist M.Fallan hәrәkat iştirakçılarını “H.” adlandırmışdır ( “to be hip” – “xәbәrdar olmaq” ifadәsindәn). H. hәrәkatının әsasında cәmiyyәtin istehlakçı, militarist, konformist yönümlü dәyәrlәrinin inkarı dururdu. Azadlıq (o cümlәdәn sosial mәhdudiyyәtlәrdәn), sevgi, altruizm, zorakılıqdan imtina, mistisizm (buddizm, caynizm, daosizm kimi Şәrq dinlәri vә fәlsәfәsinә maraq), tәbiәtә yaxınlıq hәrәkatın ümumi dәyәrlәri idi. Etnik mәdәniyyәtlәrә (mәs.,Amerika hindilәrinin) vә ekoloji hәrәkatlara maraqda H.-nin sәciyyәvi cәhәtidir. H. kommunaları hәm şәhәrlәrdә, hәm dә tәbiәt qoynunda yaradılırdı; sәyahәtlәrә hәvәs hәrәkat üçün norma sayılırdı. ABŞ-ın Vyetnamda apardığı müharibәyә qarşı hәrәkatda, o cümlәdәn 1967 ildә “Pentaqonun mühasirәsi”ndә vә s. H. fәal iştirak etmişdi. H.-nin siyasi qanadı olan yippi (ing. Yippies; “YİP – Youth İnternational Party”) radikal sol mövqedә dururdu (liderlәri C.Rubin vә E.Hoffman). Rok-musiqinin, folk-musiqinin, cazın vә digәr cәrәyanların yüksәlişi H. hәrәkatı ilә bağlıdır (1967 ildә Montereydә vә 1969 ildә Vudstokda festivallar).
Narkotik maddәlәrdәn istifadәyә “şüurun genişlәnmәsi”, şüurun dәyişkәn vәziyyәtlәrinә nailolma vasitәsi kimi baxılırdı (ideoloqu T.Liri idi). H. submәdәniyyәtinin әsas dәyәrlәri olan azadlıq vә tәbiilik zahiri görünüşdә (uzun, dağınıq saçlar, cins parçadan geyim, ucuz bәzәk әşyaları vә s.) әksini tapırdı.
ABŞ-da H. hәrәkatı liberallaşma proseslәrinә, şәxsi azadlıqların genişlәnmәsinә tәsir göstәrmişdir.
Dünyanın digәr ölkәlәrinә dә yayılmış H. hәrәkatı 1970–73 illәr tәnәzzülündәn sonra çoxsaylı submәdәniyyәtlәrdәn birinә çevrilmişdir.
