“HİPPOKRÁT ANDI” – Qәdim Yunanıstanda hәkimin şagirdlәri tәhsili qurtararkәn verdiklәri peşә әhdinin şәrti adı. Digәr peşә andları (heykәltәraşların, inşaatçıların vә s.) ilә bәrabәr mövcud idi. Şifahi әnәnәdә hәkim ailәlәrindә nәsildәn-nәslә ötürülürdü. “H.a.”-nın mәtni, әsasәn, Hippokrata qәdәr yaranmışdı. İlk dәfә yazılı şәkildә İsgәndәriyyә kitabxanasında “And” adı ilә tәrtib olunmuş vә “Hippokrat toplusu”na daxil edilmişdir (e.ә. tәqr. 280). Sonralar “H.a.” adlandırılmışdır. Andı tәqdis edәn allahların (Apollon, Asklepi, Gigiyeya vә Panakeya) yardım vә dәstәyini, andı pozanların cәzalandırılmasını nәzәrdә tuturdu; hәkimlәrә cәmiyyәtin etibarını qazanmağa vә özünü şarlatanlardan qorumağa kömәk edirdi; yüksәk әxlaqi hәkim davranışının zәmanәtçisi kimi pasiyentlәri qoruyurdu.
“H.a.”-nın başlıca müddәalarının (müәllimә ehtiram, yüksәk әxlaqi tәlәblәr, xәstәyә zәrәr yetirmәmә, hәkimlik sirri) bütün dövrlәrdә hәkimlәrә böyük tәsiri olmuş vә etik qaydaların, fakültә vәdlәrinin, hәkim andının, әhdinin әsasını tәşkil etmiş, hәr bir ölkәnin vә hәr bir dövrün etik vә ictimai normalarına uyğun yeni müddәalarla tamamlanmışdır.
