HİPPÓN (yun. Ἱρρών, lat. Hippo Regius) – Şimali Afrikada, indiki Ənnabә ş. (Əlcәzair) yaxınlığında qәdim şәhәr. İlk vaxtlar Finikiya vә Karfagen portu olmuş, e.ә. 2 әsrdә Numidiyanın, e.ә. 1 әsrin ortalarından Romanın, eramızın 431 ilindәn Bizansın tәrkibindә idi. Qazıntılar nәticәsindә mәrmәrlәrin çoxluğu, qeyri-adi iri ölçülәri vә tәmtәraqlı müxәllәfatı, parlaq döşәmәüstü mozaikaları vә dәbdәbәli forumu (Korinf orderinә aid mәrmәr sıra sütunların qalıqları; 1 әsr) ilә seçilәn qeyri-müntәzәm planlı Roma şәhәri (Finikiya mәskәninin yerindә dar vadidә salınmışdı) aşkar edilmişdir. Döşәnmiş küçәlәr sistemi; teatr (1 әsr, oyma naxışlı mәrmәr panno, üzәrindә menadanın, Apollonun tәsvirlәri olan relyeflәr); fәvvarәlәr (o cümlәdәn Qorqonanın maskası şәklin dә); 2 әsrә aid akveduk vә çәn qalıqları; Cәnub termaları (3 әsrәdәk); Böyük şimal termaları (3 әsr, mәrmәr döşәmәlәr vә mәrmәrlә üzlәnmiş divarlar, mozaikalar); 1–5 әsrlәrә aid mozaikalı villalar mәhәllәsi tәdqiq olunmuşdur. 4–5 әsrlәrә aid xristian tikililәri kompleksinә üçnefli bazilika (apsida, 2 kapella; mozaikalar, başdaşılar), bap tisteri (5 әsr) vә s. daxildir. Müq. Avqustin bazilikası (19 әsrin sonu) saxlanılmışdır. Arxeologiya muzeyi var.
Hippon. Müqәddәs Avqustin bazilikası.
