HÓBSON (Hobson) Con Atkinson (6.7.1858, Derbi – 1.4.1940, London) – ingilis iqtisadçısı vә siyasi publisisti. Şәhәr qәzeti sahibinin ailәsindә doğulmuşdur. Oksforddakı Linkoln kollecini (1878) bitirmişdir. 1880–87 illәrdә Derbi şәhәrindә mәktәb müәllimi işlәmişdir. 1887 ildә Londona köçmüş vә fabiçilik hәrәkatına qoşulmuşdur; Oksford vә London un-tlәrindә 10 il ingilis әdәbiyyatı vә siyasi iqtisaddan populyar mühazirәlәr oxumuşdur. 1889 ildә biznesmen A.F.Mammeri ilә birgә “Sәnayenin fiziologiyası” kitabını buraxmışdır. Kitabda iqtisadi depressiyanın hәddindәn artıq qәnaәtlә izah olunması C.M.Keynsin effektiv tәlәb konsepsiyasını qabaqlamışdır.
C.Röskinin, ingilis sosioloqu L.T.Hobhausun vә T.Veblenin bioqrafiyaları, hәmçinin özünün “Müasir kapitalizmin tәkamülü” (1894) vә “İmperializm” (1902) әsәrlәri dә daxil olmaqla 50-dәn artıq kitabın müәllifidir. İmperializm konsepsiyasını H. jurnalist kimi iştirak etdiyi ingilis-bur müharibәsinin tәsirilә işlәmәyә başlamışdı. Britaniyanın imperialist ekspansiyasına qarşıçıxan H. onun sәbәbini mәtbuata nәzarәt edәn maliyyәçilәrin inkişaf etmәmiş әrazilәrә spekulyativ investisiyalar qoyuluşu vasitәsilә qazanc әldә etmәk hәrisliyindә görürdü. H. hәmçinin B.Britaniyanın Birinci dünya müharibәsinә qoşulmasını da qınamışdır. Müharibәdәn sonra H. Millәtlәr Cәmiyyәti vә Versal müqavilәsinә kәskin mәnfi rәyini bildirmişdir. 1919 ildә H. Leyboristlәr Partiyasının üzvü, reformizmin әn görkәmli ideoloqlarından biri olmuşdur.
Hobhausla birgә fiskal-yenidәn bölüşdürmә siyasәti vә biznes üzәrindә ictimai nәzarәtin tәyin edilmәsi vasitәsilә kapitalist sisteminin dinc yolla rifah dövlәtinә çevrilmәsini (“sosial liberalizm”i) әsaslandırmışdır.
Ə s ә r i: Эканомика распределения. M., 1903.
