HOHOKÁM (papaqo-pima dilindәki huhugam – “gedәnlәr” sözündәndir) – 1–15 әsrlәrdә Şimali Amerikanın c.-q.-indә, әsasәn, indiki Arizona (ABŞ) vә Sonora (Meksika) ştatlarının әrazilәrindә yaşamış hindilәrә mәxsus arxeoloji mәdәniyyәt. 1930-cu illәrdә H. Qladuin tәrәfindәn Gila çayı hövzәsindә aparılmış qazıntıların nәticәlәrinә görә müәyyәnlәşdirilmişdir. Erkәn (1–8 әsrlәr), müstәmlәkә (8–11 әsrlәr) vә klassik (11–15 әsrlәr; 4 mәrhәlәyә ayrılır) dövrlәrә bölünür. Digәr dövrlәşmәsi dә var. H. üçün ağ, yaxud açıq-qәhvәyi fon üzәrindә qırmızı naxışlı (meandr, spiral vә s.) keramika sәciyyәvidir. Mәskәnlәr münbit torpaqlarda, su arteriyaları yaxınlığında salınmışdır. Klassik dövrdә mәskәnlәrin sayı vә sahәsi xeyli artır, onların planlaşdırılması mürәkkәblәşir, bәzilәri “şәhәr” hesab edilir. Sneyktaun çiçәklәnmә dövründә (11 әsr) keramika istehsalının regional mәrkәzi idi; sah. tәqr. 7 ha olan әrazidә top oyunları üçün 2 kort, maund, meydan, çiy kәrpicdәn tikililәr, sah. 15–25 m2 olan yarımqazmalar yerlәşirdi. Kasa-Qrandedәn tapılmış dәniz balıqqulağı, firuzә, mis zınqırov, tropik tutuquşu skeletlәri Mezoamerika ilә әlaqәlәrin mövcudluğunu göstәrir. Dayaz qәbirlәrdә bükülü vәziyyәtdә dәfn adәti klassik dövrdә, әsasәn, meyityandırma adәti ilә әvәzlәnir. H. sakinlәri yüzlәrlә kilometr uzanan kanallardan istifadә etmәklә vә çay mәcralarını qismәn dәyişdirmәklә әkinçilik (qarğıdalı, paxla, balqabaq, pambıq, aqava), yığıcılıq vә ovçuluqla mәşğul olmuşlar. H. yerli әnәnәlәr әsasında formalaşmışdır. H. mәdәniyyәti daşıyıcılarının nәsillәri hindi pimalar hesab edilir.
Hohokam mәdәniyyәti. Antropomorf gil qab. 300–900 illәr. Hyord muzeyi (Arizona ştatı, Finiks ş.)
