HOKUSÁY Kasusika [әsl adı vә soyadı Tokitaro (sonralar Tesudzo) Kavamura; müxtәlif tәxәllüslәri olmuşdur] (1760, Edo yaxınlığında, Hondzö Variqesuy – 1849, Obuse) – yapon qrafiki vә boyakarı. Ukiyö-e janrının әn görkәmli nümayәndәlәrindәn biridir. 30 mindәn artıq rәsm, boyakarlıq әsәri, dәzgah qravürası vә illüstrasiyası mәlumdur. 13 yaşından qravüraçı Nakayama Tesudzodan dәrs almış, hәmçinin ksiloqrafiya texnikasını da mәnimsәmişdir. 1778–92 illәrdә teatr rәssamı Kasukava Sünsönun emalatxanasına daxil olmuş vә Kasukava Sünro adını qәbul etmişdir. Burada onun kabuki teatrının aktyorları vә sumo gülәşçilәrinin tәsviri olan ilk müstәqil qravüraları yaranmışdır. 1781 ildәn kitab illüstratoru, dәzgah qravürası ustası vә rәssam kimi çalışmışdır. 1798–1805 illәrdә qadın portretlәri seriyalarını, hәmçinin “İtako mahnıları”, “Qırx yeddi sadiq vassalın әhvalatı” kitablarına rәngli illüstrasiyalarını nәşr etdirmişdir. Bunların ardınca “Şәrq paytaxtının sәkkiz görüntüsü”, “Ominin sәkkiz görüntüsü”, “Sumida çayının görüntülәri” adlı peyzaj qravüraları seriyasını yaratmışdır. 1797 ildәn әsәrlәrini Hokusay tәxәllüsü ilә imzalamış, 1800 ildәn isә özünü Qakyödzin Hokusay (“rәsm dәlisi Hokusay”) adlandırmışdır. 1810 ildә gәnc rәssamlar üçün dәrs vәsaiti kimi nәzәrdә tutulmuş “Manqa” albomlar seriyası üzәrindә işlәmәyә başlamışdır. 1820–30-cu illәr H. yaradıcılığının çiçәklәnmә dövrü olmuşdur. Bu illәrdә ölkәni sәyahәt etmiş vә Yaponiyaya hәsr olunmuş peyzaj qravüraları seriyasını (“Fudzi dağının 36 mәnzәrәsi”, 1823–31; “Müxtәlif әyalәtlәrin mәşhur şәlalәrinә sәyahәt”, 1827–33; “Fudzi dağının 100 mәnzәrәsi”, 1834–35 vә s.) işlәmişdir. 1834 ildәn didaktik xarakterli illüstrasiyalı albomlar nәşr etdirmiş, hәmçinin kağız vә ipәk üzәrindә şәkillәr çәkmişdir. 1848 ildә “Boyalardan düzgün istifadә” kitabını çap etdirmişdir. Bütün әmlakını mәhv edәn yanğından (1839) sonra H. sәrgәrdan hәyat keçirmiş, 1841 ildә mәşhur mesenat Takai Kodzananın dәvәtilә onun Obusedәki malikanәsinә gәlmiş vә ömrünün sonunadәk orada yaşamışdır. H.-ın çox sayda rәsm vә boyakarlıq әsәrlәri Obusedәn Avropa vә Amerika muzeylәrinә aparılmışdır. H. Avropa ölkәlәrindә tanınan ilk yapon sәnәtkarı olmuşdur.
Hokusay Kasusika. “Kau әyalәtindә dağ aşırımı”. 1830.
“Fudzi dağının 36 mәnzәrәsi” seriyasından.
