HOLAR (özlәrini “adam” adlandırırlar) – Mәrkәzi Hindistanda (Bihar ştatı, Sinqhbhum r-nu) mundalar qrupundan xalq. Sayları 1,1 mln. nәfәrdir (2001). Mundari dilinin dialektindә danışırlar. “Qeydiyyata alınmış tayfalar”ın (adivasilәr) tәrkibinә daxildirlәr. Dindarları hinduistdir, bir qismi әnәnәvi inanclarını saxlayır.
H., ehtimal ki, mәdәniyyәt baxımından yaxın olduqları mundalardan ayrılmışlar. Əsas mәşğuliyyәtlәri kotan әkinçiliyi (çәltik, darı, paxlalılar), yığıcılıq, ovçuluq, balıqçılıqdır. Maldarlığın (davar, inәk, kәl) әhәmiyyәti azalmaqdadır. Torpaq çatışmazlığı sәbәbindәn gәnclәr şәhәrlәrә axışır, aşağı kastaların sıralarını doldururlar. Ekzoqam qәbilә qruplarına (kili) әnәnәvi bölgü qalmaqdadır. Hәr bir kәndin müqәddәs meşәsi, qәbiristanlığı, ayini rәqslәr üçün meydançası var. Müasir H. arasında sosial tәbәqәlәşmә güclüdür, fәhlә sinfi vә ziyalılar formalaşmışdır. Gәlin üçün ödәnc çox yüksәkdir (10–70 baş mal-qara). Mal-qaranı çox vaxt pulla әvәz edirlәr. Şamanların (xüsusilә qadınların) rolu böyükdür.
