HOLL (Hall) Qrenvill Stenli (1.2.1846, Massaçusets ştatı, Aşfild – 24.4.1924, Massaçusets ştatı, Vuster) – ABŞ psixoloqu, pedologiyanın vә amerikan eksperimental psixologiyasının banilәrindәn biri. 1878–80 illәrdә Almaniyada Q.T.Fexner vә V.Vundtdan dәrs almışdır. Harvard Un-tinin fәlsәfә doktoru (1878), Baltimorda Cons Hopkins Un-tinin mühazirәçisi vә prof.-u (1883–88) olmuş, Klark Un-tinin prof.-u vә prezidenti ikәn (1889–1920) ABŞ-da ilk Uşaq Psixologiyası İn-tunu yaratmışdır. İlk amerikan psixologiya jurnalının (“American Journal of Psychology, 1887) tәşkilatçısı, hәmçinin yaş vә uşaq psixologiyası, elәcә dә tәtbiqi psixologiyaya dair jurnalların tәsisçisi, ABŞ Psixologiya Assosiasiyasının birinci prezidenti (1892) olmuşdur. Daha çox uşaq vә pedaqoji psixologiyaya dair әsәrlәri ilә tanınmışdır. Uşağın öz psixi inkişafında insan nәslinin psixi inkişafının mәrhәlәlәrini qısaca tәkrarladığını iddia edәn rekapitulyasiya nәzәriyyәsinin tәrәfdarı olmuşdur (bax Biogenetik qanun).
