HOY Kristofer Endrü (Kris) (d.23.3.1976, Edinburq) – şotland idmançısı. 2000-ci – 2010-cu illәrin әvvәllәrindә trekdә dünyanın әn güclü veloyürüşçülәrindәn biri. 6 Olimpiya qızıl mükafatını qazanmış ilk britaniyalı idmançıdır. 14 yaşından trek yarışlarının iştirakçısıdır. 1999 ildә dünya çempionatının komanda sprintindә gümüş; üç Olimpiya Oyunlarında (2004, Afina; 2008, Pekin; 2012, London) müxtәlif dәrәcәlәrdә 6 qızıl, 1 gümüş; 13 dünya çempionatında (2002–12) 11 qızıl, 8 gümüş, 6 bürünc medal әldә etmişdir. Edinburq Un-tini bitirmişdir (1999). Şotlandiyanın (2003, 2008) vә Böyük Britaniyanın (2008) әn yaxşı idmançısı seçilmişdir. Edinburq Un-tinin (2005) vә Sent-Endrüs Un-tinin (2009) fәxri doktorudur. 2009 ildә cәngavәr tituluna layiq görülmüşdür.
