HÚBLİ-DHÁRVAD, D h a r v a r – Hindistanın c. hissәsindә, Karnataka ştatında şәhәr (Hubli vә Dharvad şәhәrlәrinin inzibati birliyi). Əh. 944 min (2011; әhalisinin sayına görә ştatın ikinci şәhәri). Nәql. qovşağı.
Dharvad 12 әsrdәn mövcuddur, qәdim ticarәt yolunun üzәrindә mühüm yükboşaltma mәntәqәsi olmuşdur. 14 әsrdә Dharvad Bәhmәni sultanlığının, sonra isә Vicayanaqar imperiyasının tәrkibinә qatıldı. 1573 ildә şәhәr Bicapur sultanı Adil şah tәrәfindәn tutuldu. 1685 ildә Böyük Moğolların hakimiyyәti altında olan şәhәri Maratha peşvaları әlә keçirdilәr. 1764 ildә Dharvad Maysur maharacәsi Heydәr Əlinin, 1791 ildә yenidәn Maratha peşvalarının nәzarәtinә keçdi. 1818 ildә britaniyalılar tәrәfindәn mühasirәyә alınan Dharvad Bombey prezidentliyinә birlәşdirildi.
Vicayanaqar imperiyası dövründәn mәlum olan Hubli pambıq, şora, dәmir emalı vә ticarәtinin mühüm mәrkәzi kimi inkişaf etmişdi. 1755–56 illәrdә Maratha hökmdarlarının, bir müddәt Maysur hökmdarı Heydәr Əlinin tabeliyindә olan şәhәri 1790 ildә Maratha peşvaları geri aldılar. 1817 ildә şәhәri ingilislәr tutdu. 1880 ildә burada d.y. emalatxanalarının inşası Hublini Cәnubi Hindistanın mühüm sәnaye mәrkәzinә çevirdi.
1947 ildә Hindistanın müstәqillik qazanmasından sonra Hubli vә Dharvad Bombey ştatının tәrkibindә qaldı. 1956 ildә digәr kannadadilli vilayәtlәrlә birgә Maysur ştatına (1972 ildәn Karnataka) qatıldı. 1962 ildә vahid bәlәdiyyә korporasiyasının yaradılması nәticәsindә Hubli vә Dharvad birlәşdi
Orta әsrlәrә aid bir neçә mәbәd, Asar binası (1646), Müasir şüşә sarayı şәhәrin görmәli yerlәrindәndir. İri elm vә tәhsil mәrkәzidir. Karnataka (1949), k.t. elmlәri (1986), hüquq (2009) un-tlәri; tibb elmlәri (1957), informasiya texnologiyaları (2015) intları vә s. var.
H.-D. Karnataka ştatının Banqalordan sonra ikinci mühüm sәnaye vә ticarәt mәrkәzidir. Şәhәrdә әczaçılıq, kimya, emal vә yeyinti sәnayesinin 1000-ә yaxın kiçik vә orta müәssisәsi, o cümlәdәn “TATA Motors” şirkәtinin müәssisәlәri; pambıq parça f-ki fәaliyyәt göstәrir. Sәnaye dәzgahları, elektrik avadanlıqları, polad furnitur, yeni nәsil dizel mühәrrikli lokomotivlәr, göndәri istehsalı inkişaf etmişdir. “VRL Logistics” – Asiyanın әn iri logistika şirkәtinin mәnzil-qәrargahı, “Software Technology Parks of India” İT-texnolgiyalar parkı, hәmçinin Hindistanın әn iri pambıq bazarı burada yerlәşir.
