HÜSEYNOV Fәrhәng Rәhim oğlu (16.7. 1949, Bakı – 16.2.2010, Bakı) – Azәrb. violinçalanı, bәstәkar. Azәrb. Resp. әmәkdar artisti (2009). 1968–71 illәrdә Azәrb. Dövlәt Konservatoriyasında (Q.Qarayevin kompozisiya, K.Dumbayevin violin sinfindә), 1971–75 illәrdә Moskva Dövlәt Konservatoriyasında (L.Koqanın violin sinfindә) tәhsil almışdır. 1975–92 illәrdә Azәrb. Dövlәt Konservatoriyasında, 1992–2010 illәrdә Adana (Türkiyә) Çuxuroba Un-tinin Dövlәt Konservatoriyasında (yeni yaradılmış ork. salonuna H.-un adı verilmişdir, 2021) pedaqoji fәaliyyәt göstәrmişdir. H. “Balaca şahzadә” (1990, A.Ekzüperinin eyniadlı әsәri әsasında), “Kodayu” (1993, Eyko Aokinin librettosu üzrә; yapon dilindә ilk opera) operalarının, “Aba kraliçası” baletinin (libretto müәllifi Altay Bayram, baş xoreoqraf Ş.Terequlov) müәllifidir. Simfonik ork. üçün “Zaman içrә sәyahәt” (1990), “Quarani kapriççio su” (2000), solistlәr, xor vә simfonik ork. Üçün “Qoy dünyada sülh olsun!” (1995), orqan üçün “Mәrasimlәr” (1991), “Kiçik kantata”
(1996), 4 romans (1997), violin vә piano üçün sonata (1997), soprano vә simli kvartet üçün “Stabat Mater” (1998), 2 saylı simli kvartet (2000) vә s. әsәrlәri var. Sәnәdli filmlәrә musiqi bәstәlәmişdir. “Mәnim arzularım haradadır’, 1983; “Polad adalar”, 1985 vә s. әsәrlәri Almaniya, İsveçrә, ABŞ, Rusiya, Türkiyә, Yaponiya vә b. ölkәlәrdә ifa edilmişdir. Bir çox beynәlxalq müsabiqәnin (Yaponiya, 1991; ABŞ, 1995; Argentina, 2000) laureatı olmuşdur.
