HÜSEYNOV Rafiq Eyyub oğlu – (4.8.1946, Şuşa – 26.11.2017, Düsseldorf, Bakıda dәfn edilmişdir) – Azәrb. diktoru. Azәrb. Resp. xalq artisti (1990). Azәrb. Resp. Dövlәt mükafatı laureatı (1990). Azәrb. Dövlәt İncәsәnәt İn-tunu (indiki ADMİU) bitirmişdir (1973). 1966–91 illәrdә Azәrb. Dövlәt Teleradio Verilişlәri Şirkәtindә diktor işlәmişdir. Yüksәk tembrli aydın diksiyaya malik olan H. televiziyada mühüm dövlәt mәlumatlarını oxumuş, “Günün ekranı” informasiya proqramı, “Dialoq”, “Dalğa”, “Sizin istәyinizlә”, “Bakı, adamlar, problemlәr”, “Palitra”, uşaqlar üçün “Şәn startlar”, “Qonaq otağı” vә s. verilişlәrin aparıcısı olmuşdur. 100-dәn artıq sәnәdli vә televiziya filminin diktor mәtnini sәslәndirmişdir (“Ölü zona”, 1988, rej. R.Nağıyev; “Nәsrulla Nәsrullayev”, rej. C.Quliyev, 1999; “Top hәm düşәr, hәm qalxar”, rej. A.Urşan, 2011 vә s.). Gәnc diktor kadrlarının hazırlanmasında xidmәti var. ADMİU-da pedaqoji fәaliyyәt göstәrmişdir (1990–91). 1991–92 illәrdә Azәrb. Teleradio Verilişlәri Şirkәtinin sәdr müavini olmuş, eyni zamanda Bakı Sosial İdarә etmә vә Politologiya İn-tunda dәrs demişdir (1992–99, 1992 ildәn prof.). “Yurd” jurnalının baş redaktoru (1993–94), Milli Kinematoqrafiya Mәrkәzinin baş direktoru (1997 ildәn), Azәrb. Kinematoqrafçılar İttifaqının katibi (2002–16) olmuşdur.
