HÜSEYNOV Rauf Rüstәm oğlu (d.4.3. 1940, Bakı) – Azәrb. fiziki, AMEA-nın m. üzvü (2014), fizika-riyaziyyat e.d. (1986). Azәrb. Dövlәt Un-tini bitirmişdir (1962). Hәmin ildәn Azәrb. EA-nın Fizika İntunda kiçik elmi işçi, elmi işçi, böyük elmi işçi vәzifәlәrindә işlәmiş, 1993 ildәn “Bәrk cisim nәzәriyyәsi” laboratoriyasının rәhbәridir. H.-un әsas elmi işlәri güclü anizotropiyaya malik kiçik ölçülü yarımkeçirici sistemlәrin enerji spektrinin termodinamiki vә optik xassәlәrinin tәdqiqinә aiddir. Tәdqiqatları әsasında müәyyәn etmişdir ki, yarımkeçiricinin elektron spektrinin eksiton dayanıqsızlığı “eksiton dielektriki” adlı yeni fazanın әmәlә gәlmәsinә gәtirib çıxarır. Yeni fazaya keçid nәzәriyyәsini qurmuş vә göstәrmişdir ki, keçid birinci növ faza keçidi yolu ilә baş verir. Yarımkeçirici nanostrukturların – nazik tәbәqәlәrin vә ifrat qәfәslәrin eksiton spektrinin vә optik xassәlәrinin nәzәriyyәsini vermiş, güclü anizotropiyaya malik olan yarımkeçiricilәrdә elektron-deşik mayesinin nәzәriyyәsini inkişaf etdirmişdir. 30-dan artıq elmi әsәrin müәllifidir.
