HYÚİŞ (Hewish) Entoni (d. 11.5.1924, İngiltәrә, Kornuell qraflığı, Foy) – ingilis astronomu. London Kral Cәmiyyәtinin üzvü (1968). Nobel mükafatı laureatı (1974, M.Rayl ilә birlikdә). 1948 ildә Kembric Un-tini bitirmiş vә Kavendiş laboratoriyasında M.Raylın tәdqiqat qrupunda fәaliyyәtә başlamışdır. 1951 ildәn Kembric Un-tindә dәrs deyir. 1952 ildә doktorluq dissertasiyasını müdafiә etmişdir. 1971 ildәn Kembric Un-tinin, 1977 ildәn Britaniya Kral İn-tunun prof.-udur. 1982–88 illәrdә Kembric Un-tinin Mallard radioastronomiya rәsәdxanasının rәhbәri olmuşdur. Elmi tәdqiqatları radioastronomiyaya aiddir. 1964 ildә kiçik bucaq ölçülü radiomәnbәlәrin sayrışması hadisәsini kәşf etmiş, müşahidә zamanı Günәş tacını, planetlәrarası fәzanı, ulduzlararası mühiti öyrәnmişdir. H.-in rәhbәrliyi altında pulsarlar kәşf olunmuşdur (1967). O, müşahidә edilәn pulsarların yerdәnkәnar mәnşәli olmasını göstәrmiş vә ilk dәfә onların neytron ulduzlarla bağlılıq haqqında fikir söylәmişdir. H. pulsarlara qәdәr mәsafәni qiymәtlәndirmiş vә onların Qalaktikada yerlәşdiyini göstәrmişdir. Kembric Un-tinin Hamilton ad. mükafatı (1951), London Kral Astronomiya Cәmiyyәtinin A.S.Eddinqton medalına (1969), London Kral Cәmiyyәtinin D.Hyuz vә digәr mükafat vә medallarına layiq görülmüşdür.
