XAKİMOV Mixail (İsmayıl) Kabiroviç (1.11.1916, Kazan qub.-nın Bolşaya Silna k. – 19.11.1986, Kazan ş.) – Sovet İttifaqı Qәhrәmanı (20.4.1945). Orta mәktәbi bitirdikdәn sonra ailәsi ilә birlikdә Bakıya köçmüşdür. 1936 ildә Sovet ordusuna çağırılmışdır. Böyük Vәtәn müharibәsindә (1941–45) Azov vә Qara dәniz sahillәrindә gedәn döyüşlәrdә iştirak etmişdir. Taqanroq vә Mariupol yaxınlığındakı desant әmәliyyatlarında fәrqlәnmişdir. 1944 ilin martında Nikolayev ş.-nin azad edilmәsi uğrunda әmәliyyatda 67 desant yoldaşı ilә qәhrәmanlıq göstәrmiş vә yaralanmışdır. Müalicәsi başa çatdıqdan sonra yenidәn döyüş meydanına qayıtmış vә müharibәnin sonunadәk xidmәt etmişdir. Ordudan tәrxis olunduqdan (1945) sonra Bakıda müxtәlif müәssisәlәrdә çalışmışdır. 1948 ildәn Kazana köçmüş, dәmiryolçu işlәmişdir. Lenin ordeni, 2 dәfә 1-ci dәrәcәli Vәtәn müharibәsi ordeni vә medallarla tәltif edilmişdir.
