XALIQOV Qәzәnfәr Əlәkbәr oğlu (16.12.1898, Bakı yaxınlığındakı Qobu k.–1.3.1981, Bakı) – Azәrb. rәssamı. Azәrb. SSR xalq rәssamı (1973). Azәrb. Dövlәt Rәssamlıq Texnikumunu bitirmişdir (1928). Boyakarlıq, qrafika vә teatr rәssamlığı sahәsindә fәaliyyәt göstәrmişdir. Yaradıcılığının erkәn dövründә “Molla Nәsrәddin” (1929–30) jurnalı vә “Gәnc işçi” (1923–39) qәzeti üçün karikaturalar çәkmişdir. “Qadınlar şöbәsi” (1930), “Firdövsinin dәfni” (1934), “Çoban Cümşüdün portreti” (1938), plakatlar vә kitab illüstrasiyaları rәssamın 1930-cu illәr yaradıcılığına aiddir. Nizami Gәncәvinin 800 illiyi ilә әlaqәdar dahi şairin portretini (1940; yubiley ilә әlaqәdar müsabiqәnin birinci mükafatı) yaratmış, “Xosrov vә Şirin” poemasına illüstrasiyalar (1941) çәkmişdir. Böyük Vәtәn müharibәsi illәrindә (1941–45) vә müharibәdәnsonrakı dövrdә X. siyasi vә satirik plakatlar, “Kirpi” (1953–58) jurnalı üçün karikaturalar işlәmiş, dәzgah qrafikası, plakat, illüstrasiya vә monumental boyakarlıq sahәlәrindә fәaliyyәt göstәrmişdir. X. Nizami ad. Azәrb. Ədәbiyyatı Muzeyinin, Moskvada Ümumittifaq k.t. sәrgisindә Azәrb. SSR pavilyonunun vә Buzovnada neftçilәrin mәdәniyyәt sarayının interyer tәrtibatının müәlliflәrindәndir. X. teatr vә kino rәssamlığı sahәsindә dә fәaliyyәt göstәrmiş, “Koroğlu” (1937, Ü.Hacıbәyli), “Şahsәnәm” (1938, R.Qlier) operalarının, “Sehrli xalat” (1964, rej. Ə.Atakişiyev), “Nәsimi” (1973, rej. H.Seyidbәyli) bәdii filmlәrinin geyim üzrә rәssamı olmuşdur. Qırmızı Əmәk Bayrağı vә “Şәrәf nişanı” ordenlәri ilә tәltif edilmişdir.
Əd.: Н а д ж а ф о в М. Казанфар Халыков, Б.,1978.
Q.Ə. Xalıqov. “Firdövsinin dәfni”. 1934. Azәrbaycan Milli İncәsәnәt Muzeyi.
