XALQ NÜMAYƏNDƏLİYİ – dar mәnada seçici vәtәndaşlar tәrәfindәn seçilәn ümum dövlәt әhәmiyyәtli nümayәndәli orqan, birpalatalı, yaxud ikipalatalı parlament; geniş mәnada parlamentdәn başlamış şәhәr, böyük kәnd, kәndlәr qrupu bәlәdiyyәsinin, hәmçinin federativ dövlәtdә federasiya subyektlәrinin, әrazi muxtar qurumlarının, rayon vә vilayәt sәviyyәli inzibati-әrazi vahidlәrinin vәtәndaşlar tәrәfindәn seçilәn nümayәndәli orqanlar sistemi.
Normativ aktların (qanunların, qәrarların vә s.), o cümlәdәn büdcә haqqında sәnәdin qәbulu; әrazilәrin inkişaf planları; dövlәt idarәçiliyinin әsas orqanlarının, bir çox ölkәdә hәm dә hökumәtin formalaşdırılması, bәzi ölkәlәrdә (mәs., Çexiyada) isә prezidentin seçilmәsi; yüksәk vәzifәli şәxslәrin tәyinatı; icraedici orqanların işinә nәzarәt vә s. bütün nümayәndәli orqanların әsas vәzifәlәridir. Bәzi hallarda (hökumәt böhranı, yerli nümayәndәli orqanlar tәrәfindәn qanunların pozulması vә s.) nümayәndәli orqanlar (yuxarı palatalar istisna olmaqla) vaxtından әvvәl buraxıla vә yeni seçkilәr tәyin edilә bilәr. Deputatların bәzi ölkәlәrdә seçicilәr tәrәfindәn vaxtından әvvәl geri çağırılması (ölkәlәrin әksәriyyәtindә bu mümkün deyil), parlament tәrәfindәn sәlahiyyәtlәrindәn mәhrum edilmәsi (mәs., cinayәt hadisәsi törәtdikdә, nümayәndәli orqanın işindә sistematik olaraq iştirak etmәdikdә) mümkündür.
