XANBALIQ – 1264–1368 illәrdә Xubilay xanın yaratdığı dövlәtin paytaxtı. Monqol imperiyasının parçalanmasından sonraMon qolustan vә Şimali Çin Xubilay xanın hakimiyyәtinә keçdi. O, keçmiş Szin imperiyasının paytaxtı Çjundu ş.-ni (indiki Pekin) Xanbalıq (“Xan şәhәri”) adlandıraraq paytaxt elan etdi. 3 il sonra keçmiş şәhәrin şm.-ş.-indә Yeni Xanbalıq adlandırılan şәhәrin tikintisinә başlanıldı vә 1271 ildә monqol-Çin Yuan imperiyası yaradıldıqda şәhәri Dadu (böyük paytaxt) adlandıraraq paytaxtı bura köçürdü. Şәhәrdә quruculuq işlәri 1293 ilәdәk davam etdi. Xubilay xan burada müsәlman vә Çin alimlәrinin rәhbәrlik etdiyi iki rәsәdxana tikdirdi. Çindә olarkәn uzun müddәt Xubilay xanın xidmәtindә olmuş Venesiya taciri vә sәyyahı Marko Polonun mәlumatına görә, şәhәrdә 1,1 mln. nәfәr yaşayır vә hәr gün bura 1000 araba yükü xam ipәk gәtirilirdi.
1368 ildә Çindә monqol hakimiyyәtinin süqutundan sonra Pekin ş. uzun müddәt X. adı ilә tanınırdı. 15–16 әsrlәrdә Avropa
mәnbәlәrindә şәhәrin adı “Kambaluk” kimi qeyd olunur. Monqolların Pekindә yaratdığı tarixi abidәlәrdәn bәzilәri günümüzәdәk gәlib çatmışdır. Bunlar arasında әn әhәmiyyәtlisi Marko Polonun farsca Pol-i Sәngin adı ilә qeyd etdiyi Lao-ku-çia körpüsüdür (Fou-çen d.y.-nun yanındakı daş körpü).
