XİROXİTO, H i r o h i t o (29.4.1901, Tokio – 7.1.1989, Tokio) – Yaponiyanın 124-cü imperatoru. 1908–14 illәrdә ali zadәgan (kadzoku) uşaqları üçün mәktәbdә, 1914–21 illәrdә Tokio Un-tinin prof.-ları vә yüksәk rütbәli hәrbçilәrin rәhbәrliyi altında Vәliәhd şahzadә üçün xüsusi in-tda tәhsil almışdır. 1921 ildәn atasının (imperator Yösihito) xәstәliyi ilә әlaqәdar şahzadә-regent olmuşdur. 1926 ilin dekabrında taxta çıxmışdır. Öz hakimiyyәt dövrünü “Söva” (“Maariflәnmiş dünya dövrü”) adlandırmışdır.
1936 ilin fevralında sol partiyaların namizәdlәrinin parlamentdәn qovulmasını tәlәb edәn radikal zabitlәrin qiyamını yatırmışdır. Eyni zamanda hәrbi xәrclәri artırmışdır. Hәrbi ekspansiyanın formal әleyhdarı olsa da, baş nazir Todzio Hideki hökumәtinin tәcavüzkar siyasәtinә qarışmamışdır. 1945 il avqustun 15-dә Yaponiyanın qeyd-şәrtsiz tәslim aktını imzalamışdır. Amerika hәrbi hakimiyyәt orqanlarının tәşәbbüsü ilә imperator ailәsinin digәr üzvlәrilә birlikdә mәsuliyyәtdәn azad edilmişdir [bax Tokio prosesi (1946–48)]. 1946 ildә bir çoxları tәrәfindәn imperatorun ilahi tәbiәtindәn vә mәnşәyindәn imtinası kimi qәbul edilәn “Ningen-sengen” reskriptini vermişdir.
