XLORKAUÇUKLAR − tәbii vә ya sintetik kauçukun mәhlulundan, yaxud sulu dispersiyalarından qaz halında vә ya maye xloru buraxmaqla alınan polimer mәhsulları. Xlorlaşma zamanı xlorun birlәşmә, hidrogenin әvәzedilmә, polimerin tsikllәşmә vә tikilmә reaksiyaları gedir. Prosesin istiqamәti temp-r, polimerin vә hәlledicinin tәbiәti ilә müәyyәn edilir.
Ən çox mәlum olan әsl X. otaq temprunda bәrk, tәrkibindә 65−70% xlor saxlayan tәbii kauçukun vә ya sintetik poliizoprenin xlorlaşma mәhsullarıdır; sıxlığı 1600−1668 kq ⁄m3; yumşalma temp-ru 70°C-dir; yüksәk kimyәvi davamlılığa malikdir; aromatik vә xlorlu karbohidrogenlәrdә, mürәkkәb efirlәrdә vә ketonlarda yaxşı hәll olur, nisbәtәn kiçik özlülüklü qatı mәhlullar әmәlә gәtirir. X. mәhlul halında poliqrafiyada, antikorroziya texnikasında, gәmiqayırmada, inşaatda istifadә olunan boyaqlar, laklar vә örtüklәr üçün bitişdirici kimi tәtbiq edilir. Yapışqanların istehsalında xlorpren, butadien-nitril vә uretan elastomerlәri әsasında alınan adhezivlәrә modifikasiyaedici kimi әlavә edilәn X.-dan rezinlәri metallara bәrkitmәk üçün istifadә olunur. X.-ın geniş tәtbiqinә onların istehsalı texnologi yasının mürәkkәb olması mane olur.
Xlorlaşma xlorlu butilkauçukun istehsalında tәtbiq edilir.
