XOLMOQOR QARAMALI – südlük istiqamәtli iribuynuzlu qaramal cinsi. 16–17 әsrlәrdә indiki Arxangelsk vil. әrazisindә yetişdirilmişdir. X.q.-nın müasir tipi 20 әsrdә Holştin cinsli buğalardan vә onların köhnә tipli X.q. inәklәri ilә cütlәşmәsindәn alınmış mәlәzlәrdәn istifadә edilmәklә yaradılmışdır. Bu heyvanlar iri, skeleti yaxşı inkişaf etmiş, möhkәm bәdәnlidir. Gövdәsi uzunsov, yelin paycıqları inkişaf etmişdir. Rәngi, әsasәn, qara-ala (bәzәn qara, qırmızı, qırmızı-ala, ağ) olur. Buğaların diri kütlәsi 1000–1200 kq, inәklәrinki 530–560 kq, yeni doğulan buzovun kütlәsi 30–35 kq, 16 aylıq düyәlәrin kütlәsi 340–360 kq olur. X.q. tezyetişkәnliyi, yüksәk südartırma qabiliyyәti ilә fәrqlәnir; inәklәrin süd mәhsuldarlığı 5500–6500 kq-dır (yağlılığı 3,85%, zülal 3,3–3,6%). Müxtәlif bölgәlәrdә yeni cinslәr yetişdirilmәsindә istifadә olunur.
Xolmoqor inәk cinsi.
