XOLÓDNI Nikolay Qriqoryeviç (10.6.1882, Tambov – 4.5.1953, Kiyev) – rus botaniki vә mikrobioloqu. Ukr. SSR EAnın akad. (1929; m. üzvü 1925), Ukr. SSR-in әmәkdar elm xad. (1945). Kiyev Un-tini bitirmişdir (1907); 1941 ilәdәk orada dәrs demişdir (1926 ildәn prof.); mikrobiologiya kafedrasının әsasını qoymuş vә ona rәhbәrlik etmişdir (1933 ildәn). Ukr. SSR EA-nın Botanika İn-tunda işlәmişdir (1920–49). 1971 ildә bu in-ta onun adı verilmişdir. X. bitki hormonları tәliminә böyük töhfә vermiş, demәk olar ki, eyni zamanda F.V.Ventlә birlikdә (1927) tropizmlәrin fitohormonal tәbiәti nәzәriyyәsini (Xolodnı–Vent nәzәriyyәsi) yaratmışdır. Çiçәkli bitkilәrin çoxalma vә yayılma ekologiyasını öyrәnmişdir; torpaqda bakteriyaların miqdari uçotunun yeni metodlarını tәklif etmişdir. Bitkilәrdә uçucu üzvi ifrazatları öyrәnmişdir. Lenin ordeni ilә tәltif edilmişdir.
